Azken egunetako goizaldeko tenperatura baxuek segida izango dute; bai, behintzat, asteburuan zehar. Euskal Meteorologia agentziak abisu horiak ezarri ditu zapatu zein domeka goizalderako. Zehazki, 00:00etatik 10:00ak arte egongo dira indarrean alerta egoerak bi egunetan.
Hainbat gomendio
Zeropeko tenperaturak espero dira, eta prebentzio neurri gisa, hainbat gomendio eman ditu Ertzaintzak.
- Ahal den neurrian, ekidin ibilgailua eta erabili garraio publikoa.
- Erabili neguko gurpilak ibilgailuetan.
- Beteta eraman erregai-tankeak, eta badaezpada, eskura izan berokiak.
- Errepidera irten aurretik, begiratu iragarpen meteorologikoa.
- Eskura izan telefono mugikorra zein bere kargagailua.
- Poliki gidatu eta martxa laburrak erabili.
- Ibilgailuen arteko segurtasun tartea handitu.
- Ez zapaldu galga izotz-plaka baten gainean, eta utzi ibilgailuari inertziaz aurrera joaten.
- Larrialdi bat izanez gero, deitu 112 telefonora.