Bergaratik sartu eta Leintz Gatzagatik irtengo da Korrika, apirilaren 1ean

Mirari Altube Arrese 2022ko urt. 19a, 11:57

22. Korrikaren ibilbidearen berri eman dute gaur AEK-k eta Debagoienera apirilaren 1ean iritsiko da. Ez da, baina, herri guztietatik pasatuko. Bergaratik sartuko da 12:00ak bueltan eta Leintz aldera egingo du: Arrasate, Aretxabaleta eta Eskoriatza zeharkatuta Leintz Gatzagatik Araba aldera egingo du. 

Amurrion hasiko du ibilbidea 22. Korrikak martxoaren 31n eta Donostian bukatu apirilaren 10ean; 2.180 kilometro egingo ditu hamaika egunetan. Bigarren egunean iritsiko da lekukoa Debagoienera, apirilaren 1ean –egubakoitza– hain zuzen ere. Soraluzetik etorriko da Bergarara (11:59), eta handik, Arrasatera egingo du (12:57); Aretxabaleta (13:43) eta Eskoriatza (13:56) zeharkatuko ditu eta Leintz Gatzagatik Legutiorantz joango da gero, Araban sartzeko. 

Ezagutzera eman duten ibilbidea oinarri hartuta Oñati, Antzuola, Elgeta eta Aramaiotik ez da pasatuko 2022ko Korrika.

Kilometroak erreserbatu

Kilometroak erreserbatzeko aukera otsailaren 1ean zabalduko dutela jakinarazi dute AEKtik. Horretarako honako telefono zenbakira deitu behar da: 946 464 000; edo helbide elektronikoz eskaera egin: gipuzkoa@korrika.eus.

Aplikazioa abian

AEKtik jakinarazi dutenez, Korrikaren aplikazioaren bidez ibilbidearen xehetasunak (ordutegiak, esaterako) eta ekimenaren beraren unean-uneko egoera kontsultatu ahal izango da. Aplikazio hori dagoeneko eskuragarri dago Android eta IOS sistema eragileen dendetan.

Hitzekin abestia

2022ko Korrika Hitzekin abestiak girotuko du. Sustrai Colinak sortutako hitzak Ane Garciak, Anarik eta Nerea Urbizuk abestu dituzte. Hiru Adin desberdineko emakumeak elkartu dituzte abesteko Nerea Urbizuren esanetan "gure helduen eta txikien arteko katearen sostengu eta bitartekaritza irudikatzeko". Gaineratu du Colinaren balio "garrantzitsuak" bultzatzen dituela: "Ausarta izatea, ahalduntzea, oztopoen gainetik aurrera egitea, beldurrak gainditzea…".

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak