Arabako erdialdean eta Ebro ondoko eskualdean soilik iragarrita zegoen arren, izoztuta esnatu dira gaur bailarako hainbat txoko. Eta Euskal Meteorologia Agentziak egindako iragarpenen arabera, ez da azken eguna izango, gainera. Izan ere, abisu horia ezarri dute zapatu goizalderako muturreko tenperatura baxuengatik eta izotz arriskuagatik.
Bihar goizaldeko 00:00tik 10:00ak arte egongo da indarrean Euskalmetek ezarritako alarma egoera, eta "izotz txikia" egingo du agentziaren arabera. Termometroek, ondorioz, zenbaki negatiboak adieraziko dituzte.
Oskarbi, baina hotz
Goizaldeko hotzek egunean zehar jarraipena izango dute; asteburuan gehienez 10 graduko langara iritsiko dira Debagoieneko termometroak. Goizean sortu daitezkeen lainoek, baina, giro oskarbi eta eguzkitsua ekarriko dute atzetik.