Errefortzu edo hirugarren dosia hartzeko aukera ari da, pixkanaka, adin-talde guztietara zabaltzen. Gaur goizean Gotzone Sagardui Osasun sailburuak Eusko Legebiltzarrean egindako agerraldian esan du 40 urtetik gorako herritarrek jada eskatu dezaketela ziztada osagarria hartzeko hitzordua. Ohi bezala, Osakidetzaren webgunearen bidez egin daiteke eskaera.
Ospitaleratzeko arriskua
Beste hainbat gairen artean, Sagarduik txertaketaren garrantzian jarri nahi izan du berriz enfasia, ospitaleratu eta ZIUetako egoera txertoen eraginarekin lotuz: "Txertatutako herritarrekin alderatuta, zortzi aldiz handiagoa da ospitaleratzeko arriskua txertatu gabeentzat; ZIUetan amaitzeko, berriz, hamabi aldiz handiagoa". "Ez dut pentsatu ere egin nahi zer zatekeen seigarren olatu hau egun dugun txertaketa tasarik gabe", gaineratu du.
Tasa, gora
Osasun sailburuak egun EAEn dauden txertatutako herritarrei egin die erreferentzia. Hots, Araba, Bizkaia eta Gipuzkoako 1.840.090 herritarrek jaso dute gutxienez dosi bat (%93,0), eta 1.816.793k dute, berriz, immunizazio osoa (%91,8). 5 eta 11 urteko haurrei dagokionez, %44,1ak jaso du dagoeneko lehen ziztada. Errefortzu dosia, aldiz, biztanleria osoaren %45,9ak hartu du; %89,5eraino igotzen da tasa 60 urtetik gorako herritarren artean. Hona, zehazki, txertaketaren egoera adin-taldeka.
| Adin-taldea | Dosi bat gutxienez | Immunizazio osoa | Errefortzu dosia |
| >= 100 urte | %95,8 | %95,0 | - |
| 90-99 urte | %93,7 | %93,7 | %96,1 |
| 80-89 urte | %97,7 | %97,3 | %93,3 |
| 70-79 urte | %96,4 | %96,4 | %94,0 |
| 60-69 urte | %95,2 | %95,2 | %83,5 |
| 50-59 urte | %95,7 | %94,3 | %22,4 |
| 40-49 urte | %92,8 | %91,9 | - |
| 30-39 urte | %87,2 | %85,0 | - |
| 20-29 urte | %85,2 | %82,7 | - |
| 16-19 urte | %93,2 | %90,9 | - |
| 12-15 urte | %96,7 | %92,2 | - |
| 5-11 urte | %44,1 | %5,5 | - |
| GUZTIRA | %93,0 | %91,8 | %45,9 |