Ikasleak atzerapenik gabe itzuliko dira ikasgeletara Gabon ostean. Hala adostu dute Espainiako Gobernuak eta autonomia erkidegoek eta horren berri eman zuten atzo. Itzultzean –batzuk urtarrilaren 7an eta gehienak 10ean– zein protokolo jarraitu beharko duten zehaztu dute gaur.
Maskararen erabilera nahitaezkoa izango da distantzia edozein dela ere; baita jolaslekuan ere. Urrian kendu zuten derrigortasun hori, aisialdirako, eta kanpoaldean Bigarren Hezkuntzarako, baina orain itzuli egingo da.
Haur Hezkuntzako ikasleek –6 urtetik beherakoak– eta Hezkuntza Bereziko ikasleek ez dute maskararik eraman beharko. Dena dela, 6 urtetik beherakoek, autobusean, maskara erabiltzea gomendatu dute.
Bestetik, burbuila-taldeak edo Bizikidetza Egonkorreko Taldea (BKT) itzuliko dira eta ikasgela burbuilatzat hartuko da berriro.
Eskola-kirolei dagokionez, berriz, soilik entrenamenduak egingo dira, ez lehiaketak, eta ahal dela, kanpoaldean edo ondo aireztatutako barrualdeetan.
Neurri horiek guztiak pandemiaren bilakaeraren arabera alda daitezkeela adierazi dute. Era berean, protokolo orokorra zorrotz betetzeko eskatu dute.
