Datuek argi adierazten dute positibo kopuruen gorakadak ez duela etenik. Horren adibide, pasa den asteko positibo kopurua pandemia osoko altuena izan bazen (1.456), aste honetako lehen hiru egunetan ia aurreko zazpi egunetan beste kutsatu zenbatu izana bailaran (1.251). Aipagarria eguaztenean atzeman ziren kasu kopurua: 771. Gisa horretara, eta urteko azken bi egunetako datuen faltan, ia 15.000 debagoiendarrek harrapatu dute birusa 2020ko martxoaz geroztik, eta 10.000tik gora izan dira 2021 honetan kutsatu direnak.
| Herriak | Astelehena | Martitzena | Eguaztena | GUZTIRA |
| Arrasate | 82 | 91 | 223 | 396 |
| Bergara | 26 | 65 | 181 | 272 |
| Oñati | 58 | 41 | 156 | 255 |
| Aretxabaleta | 22 | 39 | 110 | 171 |
| Eskoriatza | 10 | 13 | 43 | 66 |
| Antzuola | 5 | 8 | 34 | 47 |
| Aramaio | 1 | 13 | 10 | 24 |
| Elgeta | 2 | 4 | 10 | 16 |
| Leintz Gatzaga | 0 | 0 | 4 | 4 |
| GUZTIRA | 206 | 274 | 771 | 1.251 |
- Grafiko eta datu guztiak ikusgai daude goiena.eus-eko azken datuak atalean.
1.361 puntu gehiago
Astelehenetik eguaztenera bitarteko erregistroek eragin zuzena izan dute intzidentzia-tasan. EAEko tasa orokorra 2.976,39an da, eta bailarakoa ia 2.000 puntu gainetik da (4.917,53an, zehazki). Debagoieneko bederatzi herriak daude EAEko tasaren gainetik; Bergara da gertuen dagoena, ia 1.000 puntu gainetik izan arren (3.870,71), eta Oñati, bestetik, gertuago da datua hirukoiztetik bikoiztetik baino (7.595,05).
Ospitaleratuak ere gora
Kasuen abiadura berean ez bada ere, EAEko opsitaleetan duden herritar kopuruak ere goranzko joera du. Domekan 381 pertsona zeuden erietxeetan, eguaztenean, aldiz, 455. Zainketa Intentsiboen Unitateetan, berriz, 110 herritar zeuden aste hasieran; 115 atzo.
Adinekoen egoitzetan, 50 kasu berri
Gipuzkoako Foru Aldundiak argitaratutako datuen arabera, probintziako adinekoen egoitzetan 50 positibo hauteman dira azken hiru egunetan; bakar bat ere ez da izan, baina, bailarako egoitzetan.
Horrez gain, aipatu behar astelehenean Bergarako Mizpirualdeko (4), Arrasateko Iturbideko (2) eta Oñatiko San Martingo (2) egoitzen artean 8 egoiliar zeudela kutsatuta. Bada, 5 dira uneotan aktibo dauden kasuak, Bergarako bi egoiliar zein Arrasateko bat sendatu gisa izendatu baititu Aldundiak.