Atzo, martitzena, Debagoienean egindako probek 205 koronabirus kasu hauteman zituzten; orain arte egun bakarrean atzeman den zenbateko handiena. Hilabete honetan hainbatetan hautsi da egun bakarrean erregistratutako kasuen marka; azkena, hilaren 10ean, 166 kasurekin.
Pandemia hasi zenetik 2021eko abendura arte, bi egunetan bakarrik gainditu da 100 kasuen langa (2020ko azaroaren 12an eta 20an). Abendu honetan, baina, hamalau egunetan erregistratu dira 100 edo 100 kasu baino gehiago egun bakarrean. Eta esan bezala, atzo 200eko langa gainditu zen. Horren eraginez, inoizko intzidentzia-tasarik altuena du bailarak.
Iazko egoerarekin alderaketa
EAEn, 2020ko abenduaren 16tik 22ra bitartean, 2.965 positibo hauteman ziren; eta 2021eko azken astean, ostera, 14.928. Halere, 12.000 positibo gehiago atzeman arren, 55 heriotza gutxiago izan dira aurten eta positiboen proportzioan gutxiago dira ospitaleratutakoak ere. Iaz, 391 lagun zauden ingresatuta –86, ZIUn–; eta aurten, 290 –101, ZIUn–.
