Astelehenean izandako jauzi nabarmenik egon ez den arren, etengabeko goranzko joeran jarraitzen dute pandemiari lotutako datuek. 369 kutsatu berri izan dira astelehenetik eguaztenera Debagoienean, aste hasiera batean inoiz izan den kopururik altuena. 123 positibo berri, bataz beste, egunean. Bereziki adierazgarriak dira Elgeta eta Oñatiko kasuak; lehenean joan den aste osoan izandako positibo kopurua pasa du hiru egunetan (+1), eta bigarrenean, aldiz, oso gertu gelditu da (-7). Uneotan, 11.711 debagoiendarri atzeman zaie birusa 2020ko martxoaz geroztik.
| Herriak | Astelehena | Martitzena | Eguaztena | GUZTIRA |
| Arrasate | 27 | 56 | 34 | 117 |
| Bergara | 23 | 35 | 33 | 91 |
| Oñati | 19 | 30 | 35 | 84 |
| Aretxabaleta | 6 | 13 | 12 | 31 |
| Eskoriatza | 8 | 9 | 10 | 27 |
| Elgeta | 1 | 5 | 2 | 8 |
| Aramaio | 3 | 2 | 2 | 7 |
| Antzuola | 3 | 0 | 0 | 3 |
| Leintz Gatzaga | 1 | 0 | 0 | 1 |
| GUZTIRA | 91 | 150 | 128 | 369 |
- Grafiko eta datu guztiak ikusgai daude goiena.eus-eko azken datuak atalean.
Inoizko daturik altuena
Azken egunetako bilakaeraren adierazle garbia da 14 eguneko intzidentzia-tasarena. Astelehenetik gaurdaino, 100 puntutik gora hazi da erregistroa; 2.282,09tik 2.396,27ra, zehazki. Aramaio, Aretxabaleta, Arrasate, Bergara, Eskoriatza eta Leintz Gatzagan 2.000tik nabarmen gora jarraitzen du datuak, eta azken hiru egunetako positibo kopurua aintzat hartuta, asko hurbildu dira tasa horretara Oñati (1.805,02) zein Elgeta (1.591,51). Antzuola da tasa 1.000tik bera izan eta beheranzko joera duen herri bakarra (826,07).
Lurraldeak gora
Bailarako datuen azpitik, baina EAEko datu orokorrek zein Araba, Bizkaia eta Gipuzkoako erregistroek goranzko joeran jarraitzen dute. Gipuzkoan 2.774, Bizkaian 2.454 eta Araban 972 positibo izan dira azken hiru egunean; EAEn, ondorioz, 6.200. Intzidentzia-tasek argi adierazten dute hiru lurraldeak eremu gorrian direla, eta baita erkidegoa bera ere, 1.000 puntuko langa lehen aldiz gaindituta (1.042,41).
Ospitaleratuak behera, ZIUak gora
Azken hiru egunetan 131 ospitaleratu berri izan diren arren, EAEko erietxeetan dauden herritar kopuruak behera egin du. Atzo 299 kutsatu zeuden ospitaleetan, domekan baino 39 gutxiago. ZIUetan, baina, kontrakoa da egoera. Eusko Jaurlaritzaren arabera, 100 herritarrek behar zuten atzo zainketa intentsiboa, pasa den igandean baino 9 gehiagok.
