EAEko 9 eta 11 urte arteko umeak txertatzeari ekingo diote bihar, eguaztena, baina Debagoieneko neska-mutikoak zapatuan, hilaren 18an, txertatuko dituzte. Bergara, Oñati, Arrasate, Aretxabaleta eta Eskoriatzako osasun etxeetan jarriko diete, goizez zein arratsaldez. Debagoieneko ESIak 1.800 txerto jasoko ditu horretarako.
Txertoa hartzeko aurrez hartu behar da hitzordua; gaur arratsaldean ireki dute hain zuzen ere. Bi aukera izango dituzte gurasoek txanda eskatzeko. Lehenengoa, webgunearen bidez; osakidetza.euskadi.eus helbidean. Eta bigarrena, ohiko osasun zentrora deituta; 1 tekla sakatu ostean, txertoa hartzeko eguna eta ordua esleituko dira.
Osasun Sailak jakitera eman duenez behin lehen dosirako data eta eguna esleitzean, SMS bidez hiru argibide emango dira: hartutako hitzorduaren baieztapena; txertaketa gunea; eta bigarren dosia jasotzeko data, ordua eta gunea. Lehen eta bigarren ziztaden artean zortzi asteko tartea egongo da.
