Azken hamalau egunetako intzidentzia tasa 300dik gorakoa denean, ostalaritza osoan, gimnasioetan, zentro soziosanitarioetan eta zaharren egoitzetan Covid Ziurtagiri Digitala eskatzea. Baita jende asko biltzen duten kirol, aisialdi eta kultur jardueretan ere. Hori da, hain zuzen, Eusko Jaurlaritzak EAEko Justizia Auzitegi Nagusiari egindako eskaria. Bide horretan, merkataritzakoak ez diren esparru itxi ia guztietan beharko litzateke ziurtagiria.
Bada, gaur eman du iritzia auzitegiko fiskaltzak ostiralean egindako eskaeraren harira, eta begi onez hartu du ziurtagiri digitalaren erabileraren hedatzea; "beharrezkoa, egokia eta proportzionatua" dela argudiatu du. Aintzat hartu beharrekoa da, baina, fiskaltzaren iritzia ez dela loteslea. Ondorioz, ikusteke dago zein izango den Administrazioarekiko Auzien Salaren ebazpena, eta ezezkoa bada, Iñigo Urkulluren gobernuaren jokabidea. Jatetxe eta gaueko aisialdi guneetako eskaera Espainiako Auzitegi Gorenera eraman zuten, eta bertan onartu.
Salbuespenak
Jaurlaritzak adierazi duenez, neurria bete beharko litzatekeen espazioetan bi herritar taldek ez lukete ziurtagiria aurkeztu beharko: 12 urtetik beherakoak eta lanean ari diren establezimenduetako langileak.
