Azken asteetako goranzko bilakaerak ez du etenik. Hori adierazten du, bederen, Eusko Jaurlaritzaren Osasun Sailak argitaratzen duen buletinak. Izan ere, 778 debagoiendar kutsatu dira azken zazpi egunetan -430 azken lau egunetan-, 111 herritar pasa eguneko. Bereziki aipagarria eguenean atzemandako positibo kopurua: 166. 2020ko martxoaz geroztik, pasa den asteko martitzena (121), eguaztena (127), egubakoitza eta zapatua (123) dira kutsatu gehien izan diren lau egunak.
| Herriak | Eguena | Egubakoitza | Zapatua | Domeka | GUZTIRA |
| Arrasate | 24 | 54 | 53 | 36 | 167 |
| Bergara | 22 | 38 | 26 | 9 | 95 |
| Oñati | 11 | 24 | 21 | 11 | 67 |
| Aretxabaleta | 7 | 29 | 10 | 5 | 51 |
| Eskoriatza | 7 | 11 | 9 | 4 | 31 |
| Aramaio | 1 | 5 | 3 | 2 | 11 |
| Antzuola | 1 | 4 | 0 | 0 | 5 |
| Elgeta | 1 | 0 | 1 | 0 | 2 |
| Leintz Gatzaga | 0 | 1 | 0 | 0 | 1 |
| GUZTIRA | 74 | 166 | 123 | 67 | 430 |
- Grafiko eta datu guztiak ikusgai daude goiena.eus-eko azken datuak atalean.
Bi milatik gora
14 eguneko intzidentzia metatua ere inoizko erregistro altuenera iritsi da: 2.282,09. Antzuola (871,96), Elgeta (1.061,01) eta Oñati (1.386,47) soilik ez dira bi milako langa horretara iristen, eta lehen biak dira, gainera, beheranzko joeran dauden bakarrak. Hala ere, eremu gorrian dira hiru herri hauek ere. Datu orokorrekin alderatuta, Gipuzkoa, Bizkaia eta Araban baino 800, 1.300 eta 1.600 puntu gorago dago Debagoieneko intzidentzia-tasa, hurrenez hurren.
Geroz eta gehiago
Kutsatze datuak eragina izaten ari dira EAEko ospitaleetan. Kasu honetan, urrun dira erregistroak pandemiako datu okerrenak izatetik, baina beheko grafikoan ikusi daitekeen bezala, goranzko joeran nabarmena da hemen ere. Zehazki, azken lau egunetan 55 herritar gehiago ospitaleratu behar izan dituzte, eta 338 daude uneotan EAEko erietxe ezberdinetan. ZIUei dagokionez, 73 dira zainketa intentsiboa behar duten herritarrak, pasa den eguenean baino 19 gehiago.
