Debagoienera etorrita, egubakoitzetik zapatura arteko gaua errekari eta lur-jausiei begira igaro dute herritar ugarik; adibidez, Bergarako Bolua, Zubieta eta Ibaiondoko bizilagunek. Azken horiek garajeak garbitzen aurkitu ditugu gaur.
Bestetik, Boluko auzokide guztiak dagoeneko itzuli dira haien etxeetara. Gaur eguerdian bukatu dituzte luiziari aurre egiteko lanak.
Zenbait errepide, itxita
Luiziak eta asfaltoan sortutako arrakalak direla-eta, bailarako zenbait puntutan errepideak itxita daude. Aramaion, Gorlarako bidean, Eskoriatzan edota Leintz Gatzagan daude arazoak. Informazio guztia dago eguneratuta Trafiko Zuzendaritzaren mapa honetan.
Urkuluk gainezka egin du
Eguaztenean edukieraren %90era iristear zen Urkulu. Ordutik ehunekoak etengabe jardun du hazten, eta gaur %100era iritsi eta gainezka egin du.
Datozen orduetarako iragarpena
Euskal Autonomia Erkidego guztian abisu horia dago indarrean, prezipitazio iraunkorrengatik. Gauerdira arte mantenduko dute, batez ere, oraindik ibaien maila altua delako. Prezipitazioei dagokienez, Gipuzkoan 10-20 l/m² inguru pilatu daitezke eta Araban 5 l/m² inguru.
Bihar, domeka, joera aldaketa izango da. Eguraldiak hobera egingo du. Eguna lainotuta hasiko den arren, apurka-apurka hodeiak saretuz joango dira, eta arratsaldean giro eguzkitsua izango da, hego ukituko haizearekin. Euriak atsedena emango du egun batzuetan.
