Deba ibaiak gainezka egin du hainbat txokotan

Itziar Larrañaga Sarasola 2021ko abe. 9a, 16:05

Iragarpenak bete eta euri-zaparradak etengabekoak izan dira gaur. Ondorioz, 15:00ak inguruan, maila laranjara heldu da Deba ibaia Elorregiko estazioan. Aramaio erreka ere oso hazita doa irudiotan ikus daitekeen moduan.

Azken 24 orduetan Elorregiko estazioan pilatutako prezipitazioa 43,30 litro metro karratuko izan da, Aixolako estazioan 50,90 l/m2, Oñatikoan 33,20 l/m2, eta Urkulukoan 35,90 l/m2.

Ondorioz, hainbat txokotan gainezka ere egin du, hala nola, Arrasaten, Kataide industriaguneko bidegorrian, zubi parean; baita Arrasatetik Aretxabaletako noranzkoan, biribilgune azpiko bidegorrian, herriko sarreran hain justu ere. Bidegorri zati hori itxi egingo dutela adierazi dute Udaltzaingotik. Errepidera ere irten du urak baina "ez du arazo garrantzitsurik sortu" eta ez dute itxi beharrik izan oraingoz. Dena den, arretaz gidatzeko eskatu dute.

Bergaran, Ibaiondon, zubi azpian irten da.

Segurtasun sailak euriagatik ezarritako alerta laranja egubakoitz arratsaldeko 15:00ak bitartean egongo da aktibo.

Bergara

Bergarako Udaleko Larrialdi Mahaia elkartu da eta "etengabeko jarraipena" egiten ari zaio egoerari. Larrialdi egoera mantendu bitartean Udaltzaingoa 24 orduko zerbitzua eskainiko du, SOS deiak eta gainerako emergentzia zerbitzuekin "uneoro" koordinatuta.

Udaltzainak hasi dira erreka bazterrean aparkatuta dauden autoen jabeei abisua pasatzen, badaezpada autoa mugitu dezaten.