Bi urteren ostean aurrez aurreko kulturaren plaza berreskuratzea izan da Durangoko Azokaren lehentasuna. "Pozik gaude berriro ere batzeko aukera izan dugulako, kulturzale eta sortzaileak plazan elkartu ditugulako berriro, egungo egoerara moldatuta bada ere", adierazi du Gerediagako presidente Nerea Mujikak.
Aurten kulturaren plaza osasun-neurrietara egokituta antolatu behar izan dute, horretarako, besteak beste, erreserba-txanda sistema ezarriz. Neurri horien aurrean kulturzaleek zein argitaletxeek erakutsitako ardura eta konpromisoa ere nabarmendu dute Gerediagatik: "Eskertu nahi dugu bisitariek une oro izan duten jarrera eta prestutasuna: ilaretan itxaroteko, Landako Gunea husteko, pilaketak ekiditeko... Kultura segurua dela argi geratu da beste behin ere".
Aurrez aurreko bisiten kopurua mugatuta egon da, eta hala, salmenta-kopurua "orokorrean baxuagoa" izan dela jakinarazi dute. Bisitari gutxiago izateari alde ona ere ikusi diote bertaratzeko aukera izan dutenek, eta, erakusmahaietara gerturatu eta sortzaileekin zuzenean egotea "inoiz baino errazagoa" izan dela azpimarratu dute.
Online dendari dagokionez, abenduaren 3tik 7ra 1.300 erosketa egin direla zehaztu dute, eta guztira 5.400 lan erosi dira. Bataz besteko gastua 58 eurokoa izan da erosketa bakoitzeko.
Gainontzeko espazioetan ere balorazio positiboa egin dute, eta adibidez Ahotsenearen kasuan, orotara 7.500 bisitari hurbildu dira Plateruenera zuzeneko kontzertuak ikustera.