Uda osteko beheranzko joera hautsiz, gora egin zuen langabeziak azaroan Debagoienean. Bi herri dira gorakada horren kausa: Arrasate (+45) eta Eskoriatza (+10). Aretxabaletan, Leintz Gatzagan eta Oñatin mantendu egin da urriko langabe kopurua, eta Bergaran (-9), Elgetan (-3), Antzuolan (-1) eta Aramaion (-1), aldiz, urteko hamargarren hilabetean baino herritar gutxiago daude lanik gabe.
Langabezia-tasari erreparatuz gero, %0,14an hazi da langabe kopurua bailaran. Kasu honetan, eta langabe datuetatik harago herriko biztanleria aktiboak erlazio zuzena duela aintzat hartuta, Elgeta izan da tasa jaitsiera handiena izan duena (- %0,51); beste muturrean dago Eskoriatza, azaroan langabezia-tasa igoera handiena izan duen bailarako herria baita (%0,50).
| Herria | Azaroko langabeak | Langabeak guztira | Langabezia-tasa |
| Antzuola | -1 | 57 | %5,25 |
| Aramaio | -1 | 16 | %2,29 |
| Aretxabaleta | = | 226 | %6,57 |
| Arrasate | +45 | 1.148 | %11,30 |
| Bergara | -9 | 528 | %7,36 |
| Elgeta | -3 | 24 | %4,04 |
| Eskoriatza | +10 | 165 | %8,25 |
| Leintz Gatzaga | = | 4 | %3,33 |
| Oñati | = | 357 | %6,59 |
| Debagoiena | +41 | 2.525 | %8,23 |