2020ko martxoaren 27an lehen positiboak atzeman zirenetik, azken hemeretzi hilabeteetan hainbat kasu baieztatu dira bailarako adinekoen egoitzetan. Gipuzkoako Foru Aldundia astez aste argitaratzen joan den datuen arabera, baina, otsailean San Juan de Dios egoitzako egoilar bat kutsatu zenetik COVID-19 kasu positiborik atzeman gabe ziren Debagoieneko egoitzak.
Gaur eman ditu jakitera aldundiak azken asteko datuak, eta datu orokorrekin gertatu gisa, gorakada izan da egoitzetan baieztatu diren positibo kopuruan. 30 dira uneotan Gipuzkoan kutsatuta dauden egoilarrak, eta horietatik 12 Arrasateko Iturbide egoitzan atzeman dira. 2020ko azarotik kasurik baieztatu gabe ziren Garibai Hiribideko eraikinean.
Artatzeko espazio berria
Pasa den astean Gipuzkoako Kontseiluak hartutako erabakien berri eman zuen Markel Olano Gipuzkoako ahaldun nagusiak, eta abenduaren 1etik aurrera Arrasateko San Juan de Dios zentroan Gipuzkoako zaharren egoitzetan COVID-19az kutsatutako egoilarrak artatuko zituztela iragarri zuen. 19 plaza egokituko ditu aldundiak Gesalibarko egoitzan.
