Polemika antzurik ez dutela elikatu nahi diote agirian eta "arduratsu izateko eta modu eraikitzailean jokatzeko borondatea" dutela gaineratu. ETAk borroka armatua behin betiko utzi zuenetik hamar urte bete direnean bakea galarazi eta inposizioa betikotu nahi dutenak daudela adierazi dute.
"Iraganeko militantzian egindako ekintzen ondorioz kaltetutako pertsonak minduta" sentitu daitezkeela ulertzen dutela adierazi dute. Eta kartzelan egon den presoak kalera irtetean hurkoen besarkada jasotzeko eskubidea duela onartuta ere, harrera-ekitaldi publikoek mina eragiten dutela jakitun dira: "Argi esaten dugu gure gogoa dela sufrimendu oro arintzea eta aukera berriak zabaltzea, zauriak sendabidean jartzea eta euskal herritarren artean elkarbizitza sendotzea".
Espainiar eta frantziar Estatuetako espetxeetako kideen artean kontsulta egin ondoren hartu du erabakia EPPK-k, hau da, harrerak soilik hurkoen giroko esparru pribatuan jasotzea: "Erabaki hau euskal preso politikook bizikidetzari, bakeari eta gurea eta gure senideena ez ezik besteen sufrimendua ere aitortzeari egiten diogun ekarpen indibidual eta kolektiboa da".
Sarerendako, enpatia ariketa
Sarek gaur, martitzena, egindako agerraldian adierazi du euskal presoen kolektiboak emandako urratsa "enpatia ariketa sendo" gisa ulertu dutela, "elkarbizitzaren bidean ekarpen garrantzitsua" dela baloratuz. Gaineratu dute, arduraz eta enpatiaz jokatzea guztien ardura dela: "Guztioi dagokigula oreka hori ahalbidetzea eta guztion esku dagoela aurrera urratsak ematen jarraitzea". Eta gaineratu dute beste pauso batzuk ere ikusi gurako lituzketela: "Espero nahi genuke elkarbizitzan aurrera egiteko borondate hori egun euskal presoei eta senideei horrenbeste min egiten dien salbuespeneko espetxe politika hau indarrean mantentzen duten horiengan ere islatzea".
