"Zergatik begiratzen dute erakundeek beste alde batera?". Hori da, hain zuzen, Arrasateko Biteri Plazan egin zuten elkarretaratzera hurbildu ziren herritarrek egiten duten galdera. Sultana Jaya aktibista sahararraren egoera salatzeko eta erakundeei gaian esku-hartzea eskatzeko deitu zuten mobilizazioa.
2020ko azaroaren 13an "Marokoko indar polizialek su-etena hautsi zutenean", familiarengana itzultzea erabaki zuen Jayak. Sei egun geroago hasi zen trantzea, Sahara mendebaldeko Bojador hiriko sarreran marokoarrek jarrita zuten polizia kontrol batean. "Kolpeak eta sexu jazarpenak" jaso ostean, etxean egotera behartu zuten familia osoa. 371 egun igaro diren honetan, egoera berean jarraitzen dute.
Giza eskubideen urraketak
Geroztik, giza eskubideen hainbat urraketa jasan dituztela salatu dute Jayak berak zein giza eskubideen alde lanean diharduten hainbat erakundek. Bortxatuak, kolpatuak eta baldintza zaurgarrietan bizitzera behartuak izan dira; arreba bortxatu izana, jasotako harrikaden ondorioz ia begi bat galdu izana, elektrizitatea moztu izana edota etxea substantzia toxikoz kutsatu izana salatu du, besteak beste, aktibista sahararrak.