"Ez goaz ondo", adierazi du Sagarduik Gobernu Kontseiluaren ostean egindako agerraldian eta gorazko joera konfirmatu egin dela azaldu: "Gora kutsatze datuetan; gora intzidentzia-metatuan; gora ospitaleratzeetan; eta gora ZIUetako ohe-okupazioetan". Gaurko datuak ere eman ditu: ospitaleetan, plantan, 176 gaixo daude –joan den astean baino 62 gehiago– eta ZIUetan, 31 –joan den astean baino bat gehiago–. Hala, funtsezkoa dela bilakaera geldiaraztea gaineratu du.
Osasun larrialdia berrezarri
Eusko Jaurlaritzak osasun larrialdia dekretatzea aztertuko du, ZIUen dauden gaixoak 50 baino gehiago badira, eta horri gehitzen bazaio gainerako adierazleen joera negatiboa. Prebentzio neurri zorrotzagoak hartu ahal izango lituzke horrela. Ildo horretatik, dei egin die erakundeei, eragileei eta norbanakoei ekitaldiak edo jarduerak antolatzen dituztenean arauak betetzeko eta betearazteko, "guztion zeregina delako".
Baliabide juridikoak
Bihar, eguaztena, elkartuko da Lurralde Arteko Kontseilua eta han honako eskaerak egingo ditu Osasun sailburuak: kanpoaldean maskara derrigorrezkoa izatea; COVID ziurtagiriaren erabilera arautzea ekitaldi eta establezimendu zehatzetan; txertoaren hirugarren dosia emateko prozesua aurreratzea; eta umeen txertoa bizkortzeko mekanismo guztiak erabiltzea.
