Iraila amaieran izandako beheranzko joerari eutsiz, urrian ere jaitsi egin da langabezian diren debagoiendarren kopurua. Arrasate (-22), Bergara (-7), Antzuola (-4), Eskoriatza (-4), Elgeta (-2) eta Leintz Gatzaga (-1) izan dira, hurrenez hurren, jaitsiera horren kausa; beste ertzean kokatzen dira Aretxabaleta (+8), Oñati (+4) eta Aramaio (+2), iraila amaieran baino langabe gehiagorekin.
Langabezia-tasei erreparatuta, %0,09ko jaitsiera izan du azken hilabetean bailara osoa aintzat hartuta. Kasu honetan, Leintz Gatzaga izan da langabezia-tasaren jaitsiera handiena izan duena (%-0,84), eta Aramaio, berriz, igoera nabarmenena izan duena (%0,28). Hona herriz herriko datu zehatzak:
| Herria | Urriko langabeak | Langabeak guztira | Langabezia-tasa |
| Antzuola | -4 | 58 | %5,35 |
| Aramaio | +2 | 17 | %2,43 |
| Aretxabaleta | +8 | 226 | %6,57 |
| Arrasate | -22 | 1.103 | %10,86 |
| Bergara | -7 | 537 | %7,49 |
| Elgeta | -2 | 27 | %4,55 |
| Eskoriatza | -4 | 155 | %7,75 |
| Leintz Gatzaga | -1 | 4 | %3,33 |
| Oñati | +4 | 357 | %6,59 |
| Debagoiena | -26 | 2.484 | %8,09 |
Elkarrizketa sozialaren defentsan
Idoia Mendia lehendakariordeak ohiko hileroko agerraldian egin du EAEko datu orokorren balorazioa, eta langabeziaren jaitsiera "berretsi" egin dela argudiatuta, urrats bat aurrera eman eta elkarrizketa soziala defendatu du, "enpleguari buruzko datu onekin batera, haren kalitateari buruzko datu onak eman daitezen".
Espainia osorako akordio bat proposatu du PSE-EEko legebiltzarkideak, "kontratazio berriek ezin dutelako nahi ez den behin-behinekotasuna eta partzialtasuna eten". Beraz, "kontratu mota horiek argituko dituen eta prekarietatea murriztuko duen lan-harremanen esparru bat" sortzeari bide eman nahi dio Eusko Jauraritzak, Mendiak adierazi duenez.
