Arrasateko eta Antzuolako jendeak hartu du parte Intxortako ibilbide gidatuan. Faxisten aurkako borroken gaineko "ezagutu beharreko kontuak" ezagutu dituzte Nerea Villaren eskutik, bisitan izan diren bi antzuolar gazteren esanetan.
Antzuolan, bien bitartean, 11:00etan jarri dute martxan gune nagusia, herri erdialdean kokatua. Azoka egin dute, batetik, elikagaiekin, artisauekin, arropa eta osagarriekin eta ibilaldiei buruzko informazioarekin; ibilaldiak, urrunagokoak eta gertukoak, "sarri ez dugulako bertakoa behar beste ezagutzen", mahaietako batean zegoen lagunak zioen bezala.
Eta umeentzat ere izan da zertan jardun, jolasekin eta tailerrekin.
Eskulanak udaletxean egin dituzte.
13:00etan, berriz, Ertzak Bidean emanaldia izan da plazan.
Puntaik Puntaren egitarauak jarraipena izango du arratsaldean eta bihar.
