Jendetsua izan da Elorregiko Sagardo Eguna

Lehenengoz egin dute, "auzoa eta ingurua dinamizatzeko" helburuarekin, eta benetan arrakastatsua izan da, hainbat herritar batu baitira eguerdi partean sagarraren bueltan. Joseba Garitaonandia arrasatearrak adierazi duenez, 240 kilo sagarrekin 120 litro sagar zuku egin dituzte gaur dolarean.

"Nire aita Elorregikoa da eta lotura handia daukat auzoarekin. Hemengo Sakone baserrian ikasi genuen sagardoa egiten eta gero, apurka-apurka, gure sagastia jarri genuen Arrasaten. Duela bizpahiru urte, Arrasateko Bertako Produktuen Azokara eraman genuen dolarea eta sagarra birrintzen aritu ginen. Gaur, Elorregiko Sagardo Egunean izan gara", gaineratu du Garitaonandiak.

Bestalde, Jesus Mari Elkoro arrasatearrak jostailu bat eraman du Elorregira, "umeak, entretenitzeaz gain, ikus dezaten nola birrintzen den sagarra". Halaber, Elgoibarko Lizagasar sagartokiko kideak ere izan dira, sagarrarekin egindako askotariko produktuak saltzen: marmelada, zukua, ozpina, sagardoa eta abar. Azkenik, sagar zukuaz eta sagardoaz gain, gosea asetzeko, saiheskia egin dute parrillan.

Garitaonandiak aitortu du Sanprubus-ak lortu duela inguruari bizia ematea baina are gehiago dinamizatzea dela Sagardoaren Egunaren helburua. Hala, gaur batutako dirua Elorregiko auzoan geratuko da eta, aurrera begira, gaurkoaren balorazioa egin ostean, erabakiko dute urteroko hitzordua izango den ala ez. Hala bada, zein formatutan egingo duten ere aurrerago erabakiko dute.

Komun bat behar dute, "behingoz"

Aukera baliatuta, salatu dute komunik ez dagoela oraindik Elorregiko biribilgunearen inguruan. "Ordua da, behingoz, komun bat jartzeko. Hiru herriren erdian dago, geroz eta mugimendu gehiago egoten da eta beharrezkoa da", azpimarratu dute.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.