Etxeko indarkeriaren edo sexu erasoen biktima izan diren emakumeentzako informazio- eta arreta-zerbitzuaren (SATEVI) azken txostenaren arabera, 2021eko bigarren hiruhilekoan indarkeria matxistaren biktima izan diren emakumeen 838 dei jaso ditu zerbitzuak.
Aurreko bi urteetako datuekin alderatuz gero gora egin dute deiek: 2020ko hiruhileko berean 68 dei gutxiago jaso zituzten; eta 2019an, 127 gutxiago. Urteko lehen sei hilabeteetan, urtarriletik –114 dei– uztailera –221– bitartean, laguntza eskaerak bikoiztu egin dira. Martxoan egin zuten bereziki gora; 238 jaso zituzten. Zerbitzuaz baliatu diren emakumeen % 80,14k EAEko biztanleak dira, 41-50 urte artekoak.
Gehienak, bikotekide ohiarenak
Laguntza jaso duten emakumeen % 32,80k 10 urtetik gora daramatzate indarkeria matxista sufritzen. % 35,95ek, aldiz, urtebete eta lau urte bitartean. Biktima gehienek senarraren, bikotekidearen (gizona) edota bikotekide ohiaren erasoak salatu dituzte: % 34,76k bikotekide ohiaren tratu txarrak pairatu dituzte, eta % 22,50ek, senarrarenak.
Emakumeen % 36,06 ezkongabeak dira, eta % 26,85, ezkonduak. Dibortziatutakoak, berriz, % 15,35 dira, eta banatzeko bidean daudenak, % 8,44. Azken kasu horietan, dagoeneko ez dute erasotzailearekin harreman afektiborik, baian bikotekide ohien indarkeria jasaten jarraitzen dute.
Erabiltzaileen erdiek baino gehiagok –% 57, 92– adin txikiko seme alabak dituzte, eta gainerako % 42,08ek ez dute adin txikikorik zaintzen edota seme-alaba helduak dituzte.