Masterraren lehenengo edizioan sistema elektroniko aurreratuak izan dituzte aztergai, Ikerlan eta Mondragon Goi Eskola Politeknikoko adituek. Guztira, bederatzi lagunek hartu dute parte, eta sustatzaileen esanetan etorkizunean eskaera handia izango duten alorrak landu dituzte: "Informatika, telekomunikazioak edo softwarearen eta hardwarearen esparruak lehentasuna dute enpresentzat, ekonomiarentzat eta industriarentzat. Esparru horretan, zaila da talentua erakartzea, gainera, datozen urteetan profesionalen eskaera handia izatea aurreikusten da".
Masterra lankidetzaren seinale
Mondragon Goi Eskola Politeknikoak eta Ikerlan zentro teknologikoak 45 urte baino gehiago daramatzate lankidetzan. Hala, MasterTECH beste urrats bat dela azaldu du Bixente Atxa Mondragon Unibertsitateko errektoreak: "Master hau aurrerapauso handia da lankidetza sendotzeko eta euskal industriarako estrategikoak diren diziplinetan profesionalak prestatzeko".
Lehen edizioaren arrakastaren ondoren, datuen analisian eta zibersegurtasunean oinarritutako bigarren edizio bat prestatzen ari dira datorren ikasturterako.
