Eguaztenetik aurrera txertatzeko hitzordua eskatu ahalko dute 12 eta 15 urte bitartekoek

Gotzone Sagardui Osasun sailburuak iragarri du bihartik aurrera 12 eta 15 urte arteko herritarrek txertoa hartzeko hitzorduak eskatu ahal izango dituztela. Era berean, dagoeneko hitzordua dutenei eta txertatzera joan ezin direnei, eskaera ezeztatzeko eskatu die Sagarduik, hala txandak libre uzteko.

Gobernu Bileraren osteko prentsaurrekoan iragarri du Sagarduik txertaketa kanpainaren hurrengo urratsa: bihartik aurrera, 12 eta 15 urte arteko gazteek hitzordua eskatu ahal izango dute, Osakidetzaren webgunean edo norberaren osasun zentrora (edo 900 20 30 50 telefonora) deituta. Adin-tarte hori ikasturtea abiatu orduko txertatzen hastea positibotzat jo du sailburuak.

Bestetik, gehitu du hitzordua hartuta duenak baina txertatzera joan ezin denak bere txanda baliogabetu behar duela, Internet bidez edo telefonoz deituta. Izan ere, azken egunetako kutsatzeen eraginez, hainbat lagunek ezingo dute tokatzen zitzaien txertoa hartu, eta dosi horiek beste herritar batzuei esleitzea nahi du Osasun Sailak.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.