Eguaztenean, Legebiltzarrean, Itziar Larizgoitia Osasun Publikoko eta Adikzioen zuzendariak txertaketaren ordena orain arte bezala mantenduko zela esan zuen, baina bi egun beranduago, Espainiako Osasuneko Lurralde Arteko Kontseiluan, Gotzone Sagardui Osasun sailburuak gazteenen txertaketa aurreratzeko eskatu zuen.
Sendagaien Europako Agentziak baimena eman ostean, Isabel Celaa Espainiako Hezkuntza ministroak iragarri du 12 eta 17 urte bitarteko ikasleek txertoa hartuta hasiko dutela ikasturtea. Jaurlaritzak ez du oraindik ezer aurreratu, baina erkidegoena da eskumena.
Arduraz jokatzeko deia, gazteei
Bitartean, Iñigo Urkullu lehendakariak eta Bingen Zupiriak Jaurlaritzaren bozeramaileak "arduraz jokatzeko" eskatu diete gazteei. 19 eta 40 urte bitarteko herritarrak oraindik "arriskuan" daudela eta zuhurtziaz jokatzea garrantzitsua izango dela esan dute.
