Iazko urrian martxan jarritako proiektuak argia ikusi du oraintsu, Aspaceko erabiltzaileek jaso dutelako AppSaac izeneko aplikazioaren lehenengo bertsioa. Aspaceko Ana Agirre tutorearen esanetan, "etekin handia" aterako diote, "bereziki pertsona batzuek", tresna berriari, komunikazio arloan laguntzeko "oso tresna ona eta intuitiboa" iruditu zaielako.
Aretxabaletako Lanbide Eskolako ikasleek garatu dute egitasmoa, Aspacekoekin bideo-deien bidez abiatutako harremanaren bitartez. Jon Unamuno irakasleak balioa eman dio kolektiboki garatzearen ideiari: "Ikasleek, zentroko erabiltzaileekin ez ezik, Uni Eibar-Ermuako informatikako ikasleekin jardun dute lanean; gure hezkuntza zentroan piktogramen karpetak osatu genituen, eta Eibarren horietan oinarritutako aplikazio desberdinak garatu zituzten".
"Praktikoa eta baliagarria"
Aukera guztietatik egokiena zeritzotena izendatu zuten Lan-bide Eskolakoek. Hala, aplikazio hori Bergarako eta Arrasateko erabiltzaileei erakutsi zieten joan den maiatzean. "Oso momentu berezia" izan zela aipatu du Agirrek, baita Aspacen "asko animatu" zirela ere. Onuradunei zer ekarriko dien galdetuta, "komunikazioa eta bizi kalitatea hobetzen, komunitatearekin inklusioa indartzen, autonomia lantzen eta ongizate emozionala handiagotzen" lagunduko diela erantzun du.
Unamunok azaldu du, esaterako, erosketak egiteko erabili ahalko dutela tresna digital berria: "Pertsona batek sagarrak gustuko baditu, piktogramen bidez erakutsiko dio saltzaileari sagarra nahi duela. Gogoko dituzten jakiak edota objektuak lehenetsita izango dituzte aplikazioan, modu pertsonalizatuan". Momentuz, AppSaac ez da ofizialki argitaratu, probak egiten baitabiltza, zerbitzua hobetzeko. Aspacen "azken 12 urteetan heziketa zentroekin ugari duten elkarlanaren" beste adibide bat da Aretxabaletako Lanbide Eskolakoekin aurrera eraman dutena, Agirreren esanetan. Unamunoren ustez, "bozgorailu ona" izango da aplikazioa, "jarraipena izango duen ekimena".