Olgeta baliabide zerbitzuko Itsaso Pagoagak, Txatxilipurdi elkarteko Lander Juaristik, eta Goiena Komunikazio Taldeko Larraitz Zeberio eman dute Jolasparkeak.eus atarian egindako egokitzapenen berri.
2017ko uztailean sortua, lau urteotan Euskal Herri osoan jasotako 60 bat jolasgune, jolas parke eta urgune biltzen ditu gidak. Tartean dira, esaterako, Debagoieneko dozena bat. Hala nola, Bergarako Oxirondo eta Labegaraieta; Arrasaten, Monterron eta dragoiaren jolas parkea; Oñatin, Usako eta Baratzeko Pikua; Aretxabaletan, Otala Zelai; Eskoriatzakn, Torrebaso eta Atzorrotz edo Elgetako Bolatoki parkea eta Asentzio hezegunea.
Zerrenda hori handitzen joango da, eta aurrerantzean Heziguneak izeneko atala ere eskainiko du atariak. "Gaur egun hezkuntza proiektu ezberdinetan dabiltza espazioak eraldatzen, jolasa aberasteko, harreman parekideak eta inklusiboak erdigunean jartzeko, eta haurren garapen prozesuan laguntzeko", azaldu dute Pagoagak, Juaristik eta Zeberiok. "Atal honetan, haur guztientzako aukera anitz eta esperientzia esanguratsuak eskaintzen dituzten eta erabilera publikoa duten espazioak batu nahi ditugu. Modu horretan, hezkuntza komunitatearen artean abiatu eta gauzatutako prozesuak bistaratzea eta balioan jartzea nahi dugu".
Heziguneak izeneko atala dator aurretik martxan ziren Jolas parkeak, Jolasguneak eta Urguneak atalak osatzera.
Itxura berria eta edukiz osatuagoa
Codesyntax-ek garatu du tresna berria. Irakurtzeko errazagoa, erabiltzeko intuitiboagoa eta jolasguneen gaineko informazioa modu bisualagoan eta erakargarriagoan aurkezten da. Nork bere herriko espazioak proposatzeko esteka ere badu orain webgunean, eta jolasaren eta espazioaren arteko harremanaz hausnartzeko txokoa ere gehitu diote webguneari; hain zuzen ere, Bloga izeneko atala.
Jolasparkeak.eus atariak, beti ere, Euskal Herriko mapan kokatzen ditu sailkatutako jolas parke eta jolasgune guztiak. "Jolaserako eraiki diren jolas parkeen artean badira ohiko patroi errepikakorretatik at material naturalez egindakoak direnak, moldaerrazak direnak, prozesu parte-hartzaileen bidez egin direnak edo haurraren motrizitatea, sormena eta abenturarako sena sustatzen duten elementu originalez osatutakoak direnak. Horiek biltzen ditugu Jolasparkeak.eus atarian", azaldu dute bultzatzaileek.
