Justizia Auzitegi Nagusiak duela bi aste kaleratutako epaiak haserrea piztu zuen hainbat eragile eta norbanakoren artean. Hain zuzen ere, epaiak adierazten du Irungo Udaltzaingorako hamabi lanposturi ezarritako hizkuntza eskakizunak bertan behera geratuko direla, eta argudio gisa erabili zuen eskaera "diskriminatzailea" dela euskaraz ez dakitenentzat.
Gauzak horrela, Euskalgintzaren Kontseiluak agerraldia egin zuen aurreko astean, eta zapatuan egingo den mobilizazioa iragarri zuen, epaiak euskararen bidea oztopatzen duela-eta: "Hizkuntza politikan eragin nahi duen epai politiko baten aurrean, euskaldunon hizkuntza eskubideak bete daitezen eta euskararen biziraupena eta biziberritzea bermatze aldera, gizartearen adostasun zabaletik eraikitzen ari garen bidea oztopatu nahi duen epaia da".
Goizeko 11:00etan izango da protesta Euskadiko Auzitegi Gorenaren aurrean. "Euskaldunok batera erantzun behar diegu bidegabekeriei eta horregatik, Kontseiluko gainontzeko bazkideekin eta beste hainbat eragilerekin batera, bertan izango gara, Euskal Herri guztiko euskaltzaleen elkarteetakook ere", azaldu dute Topaguneko kideek.
