Zapatuan, 10:00etan, Arrikrutz tantaz tanta, lurpeko geologia argitara hitzaldia eskainiko du Martin Arriolabengoak. 11:00etan, bestetik, Harri Jasangarriaren paisaia kulturala ezagutzeko ibilaldia egingo dute Leintz Gatzagan. Horren ostean, eguerdian, geo-jolasak egingo dituzte, Oñatin, 8 urtetik gorako haurrek; herriko geologia ezagutzeko ginkana, alegia. Azkenik, Bergarako geologia ezagutzeko bisita gidatua ere egingo dute, Laboratorium museoan hasita.
Domekan, jarraipena
Hurrengo egunerako, domeka, 09:00etarako bi ibilbide antolatu dituzte. Eskoriatzan izango da bata: Degurixan, karstaren bailara ezagutzeko aukera izango dute; eta bestetik, Udalatxeko karsta eta Gongetako meatzeak bisitatuko dituzte Arrasaten. Geologoek gidatuko dituzte ibilbideak. Horrez gain, 09:30ean hasiko da, Aretxabaletan, Uretsen Ibilbidea, eta ordu berean egingo dute espeleoabentura, Oñatiko Arrikrutz kobetan. 11:00etan egingo dute berriro ere Leintz Gatzagako ibilbidea. Amaitzeko, 16:00etan eta 18:00etan, Arrasateko Galarragako kobara egingo dute bisita.
Datorren asteburuan ere izango da zer egin: hilaren 29an eta 30ean Bizi pottoka hitzaldia eta bisita gidatuko ditu Jon Elorzak.
Edukiera mugatua izango dute ekintza guztiek, eta, beraz, aurrez egin beharko da erreserba, 943 79 64 63 edo 943 71 89 11 telefono zenbakietara deituta, edota infoturismo@debagoiena.eus helbidera mezua bidalita.
