Grafiko eta datu guztiak ikusgai daude goiena.eus webguneko azken datuak atalean.
Intzidentzia-tasen bilakaerari erreparatuta, zenbatekoek behera egin dute Arrasaten, Eskoriatzan eta Aramaion. Gainera, azken horretan, 400etik behera jaitsi da tasa (zehazki, 202,70ekoa erregistratu da). Eta bestetik, gora egin dute intzidentziek Oñatin eta Elgetan (1.149,43ra iritsi da). Gainerako herrietan, berdin mantendu dira zenbatekoak azken orduetan.
Neurri murriztaileei dagokienez, gogoratu behar da astelehenetan argitaratzen duela ebazpena Osasun Sailak, eta hortaz, ordura arte berdin mantenduko da herrietako egoera. Hurrengo mapan, gorriz markatuta daude neurriak indarrean dituzten udalerriak:
> Herri gorrietan indarrean dauden neurriak:
- Itxiera perimetrala. Udalerria perimetralki itxita dago, eta alboko herrietara joan ahal izango da, bakarrik, erosketak edo kanpoko kirola egiteko.
- Ostalaritza barruak. Establezimenduen barnealdeetan egoteko ordutegia egongo da: 06:30etik 09:30era eta 13:00etatik 16:30era. Terrazak orain arte bezala zabalik egon daitezke.
- Kirola barruan. Gune itxietan kirola egiteko, taldeek ezingo dute lau laguneko kopurua gainditu, kirolari federatuak eta profesionalak izan ezik. Aldagelak eta dutxak ezingo dira erabili, igerilekuetan izan ezik –gune horietan %35eko edukiera baimenduta dago, eta baita dutxak bakarka erabiltzea ere–.
Positibotasun-tasak, behera
13.893 PCR eta antigeno proba egin ziren atzo Hego Euskal Herrian, eta proben % 5,6k eman zuen emaitza positiboa Euskal Autonomia Erkidegoan eta % 5,1ek Nafarroan; behera egin du positibotasunak. Nolanahi ere, 768 izan ziren hautemandako kasu berriak: 351 Bizkaian, 246 Gipuzkoan, 122 Nafarroan, 42 Araban eta zazpi bestelako lurraldeetan erroldatutakoen artean.
EAEko ospitaleetan, 92 izan ziren ingresatutakoak –aurreko egunean baino 47 gehiago– eta guztira, 681 dira erkidegoko erietxeetan ospitaleratuta daudenak. Horri lotuta, Zaintza Intentsiboetako Unitateak eragiten du kezka, izan ere, –eta herenegun baino zazpi gutxiago badira ere–, 188 lagun daude egoera larrian. Nafarroan berriz, lau lagun ingresatu zituzten eta 183 daude erietxeetan; horietatik 31, ZIUn.
Trasmisio taula, eguneratuta
COVID-19aren transmisioa nola egiten den jasotzen duen taula itzuli du Elhuyarrek. Bertan, pertsona asintomatikoak aintzat hartuta, hainbat egoeratan dauden kutsatzeko aukerak aztertu dira:
Iturria: Nicholas R Jones et al./BMJ eta Elhuyar
