160.000 txerto baino gehiago jarri dira azken astean EAEn

Momentu honetan, 70-79 eta 60-69 urte bitartekoak ari dira txertatzen, eta aurreko asteko txerto kopuru bera jasoz gero, Osasun sailburuaren arabera, aste honetan bertan jarriko dizkiete lehenengo dosiak adin-tarte horietako guztiei.

Gaur bertan eguneratutako datuen arabera, 622.987 lagun dira txertoaren lehenengo dosia bakarrik jaso dutenak eta 240.915k jaso dituzte biak. Bestetik, 18.658 dira Janssenen ziztada bakarra hartu dutenak edota protokoloak aginduta dosi bakarra jaso behar izan dutenak.

Aurreko asteazkenean 738.772 ziren momentura arte jarritako dosiak eta gaurko buletinean jakinarazi denez, 888.530 dira orain; guztira, 152.758 gehiago. Sagardui Osasun sailburuak jakinarazi du, guztira, aurreko astelehenetik hasita, 160.000 dosi baino gehiago izan direla astebetean jarritakoak, eta erritmo horri eutsi nahi zaiola.

Une honetan, 70-79 eta 60-69 urte bitartekoak ari dira txertatzen –lehenengoak Pfizerrekin eta bigarrenak AstraZenecarekin– eta aurreko asteko txerto kopuru bera jasoz gero, aste honetan bertan jarriko dizkiete talde horietako guztiei lehenengo dosiak.

Txertaketaren bilakaera, datuetan

Txertaketa-taldeei erreparatuta, Osasun Sailak jakinarazi duenez, zentro sozio-sanitarioetako egoiliar eta profesionalen % 100ek jaso dituzte bi dosiak eta baita Osakidetzako profesionalek ere. Bestetik, zentro pribatuen eta garraio sanitarioaren alorreko % 92,1ek jaso du lehenengoa eta % 73,4k bigarrena. Eta taldeekin bukatzeko, unibertsitatez kanpoko hezkuntza arlokoek, beste zerbitzu sozio-sanitarioetako profesional eta erabiltzailek eta ertzainek ziztada bakarra jaso dute; hain zuzen ere, % 100ek jaso du lehenengo dosia eta inork ere ez bigarrena.

Bestetik, adinka antolatutako taldeei erreparatuta, honakoa da egoera:

Adin-taldea 1. dosia 2. dosia
100 edo gehiago % 100 % 98,8
90 - 99 % 100 % 98,1
80 - 89 % 100 % 88,1
70 - 79 % 73,1 % 17,6
60 - 69 % 55,9 % 5,9

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.