Azken astean sei lagun hil dira bailaran COVID-19aren eraginez

Osasun Sailak emandako datuen arabera, hilaren 19tik 25era 49 lagun zendu dira Euskal Autonomia Erkidegoan; horietatik sei, Debagoienean. Zehatzago esateko, azken astean, bost arrasatear eta eskoriatzar bat hil dira COVID-19aren ondorioz.

Urtarrileko bigarren astetik erregistratutako zenbateko handiena da azken astekoa; urtarrilaren 4tik 10era hamaika heriotza zenbatu ziren Debagoienean, eta ordutik azken hau izan da datu latzena. Azken hilabeteei erreparatuta, otsailean, guztira, zazpi debagoiendar zendu ziren, martxoan beste zazpi, eta apirilean zortzi izan dira.

Dagoeneko, pandemia hasi zenetik 166 dira bailaran gaitzaren ondorioz hil direnak: 85 Arrasaten, 37 Bergaran, hemeretzi Aretxabaletan, hamalau Oñatin, zortzi Eskoriatzan eta bana Antzuolan, Aramaion eta Elgetan.

Hego Euskal Herrian, 5.350 hildako

Iazko martxotik hona, 5.350 lagun hil dira Hego Euskal Herrian, koronabirusaren ondorioz: 4.187 Euskal Autonomia Erkidegoan eta 1.163 Nafarroan.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.