Carlos III.a Osasun Institutuak sustatu duen saiakuntza klinikoaren helburua da ebaluatzea organismoak nola erantzuten dion profil desberdineko txertoen konbinazioari. Zehazki, jakin gura dute AstraZeneca txertoaren lehen dosia jaso duten pertsonei gero Pfizer txertoaren dosi bat emanez gero organismoak nola erantzuten duen; segurtasunari, immunitate-sistema aktibatzeko gaitasunari eta immunitate-erantzuna sortzeari dagokionez.
Biocruces Bizkaiarekin batera, Estatuko beste lau zentro aukeratu dituzte saiakuntza hori egiteko: Bartzelonako Vall d'Hebron eta Clinic Barcelona ospitaleak, eta Madrilgo La Paz eta Clinico San Carlos ospitaleak.
Jaurlaritzatik adierazi dute CombiVacS saiakuntza klinikoa datorren astean jarriko dutela abian, eta 18 urtetik gorako boluntario osasuntsuei, osasun egonkorra dutenei eta haurdun ez dauden emakumeei zuzenduko zaiela. Pertsona horiei urtebetez egingo zaie jarraipena, lehen hilabetetik aurrera tarteko analisiak eginez.