Gaur eguneratuko da udalerri gorrien zerrenda eta LABI teknikoa ere bilduko da

Gaur arte hemeretzi izan dira 100.000 biztanleko 400 kasuren langa gainditzen zuten herriak EAEn; baina horietako bat ere ez da Debagoienekoa izan. Baina zerrenda eguneratuko da gaur, eta Sagardui sailburuak aurreratu duenez, 26 izango dira kolore gorria hartuko duten erkidegoko herriak.

Debagoieneko azken datuei erreparatuta (apirilak 1) Arrasate da 400eko langa gainditzen duen bailarako herri bakarra: 470,97ko intzidentzia erregistratu zuen eguenean. Eta atzetik ditu Oñati (348,80) eta Bergara (339,19). Dena den, azken lau egunetako datuak aztertu beharko dira zerrendara bailarako herririk batuko den edo ez ikusteko.

Bestetik, LABIren batzorde teknikoa ere bilduko da gaur, eta LABI politikoari neurri berriak proposatuko dizkioten edo ez erabakiko dute.

Herri gorrietan, neurri murriztaileak

400etik gorako intzidentzia-tasa erregistratzen duten herrietan, neurri murriztaileak jarriko dira indarrean bihar bertan. Herriak perimetralki itxita egongo dira –nahiz eta ondoko udalerrira joan ahalko den erosketak egitera edo aire librean kirola egitera–.

Bestetik, taberna eta jatetxeek 06:30etik 09:30era eta 13:00etatik 16:30era izan ahalko dituzte barrualdeak irekita. Eta kirolari dagokionez, ezin izango dira lau lagun baino gehiago elkartu toki itxietan–federatuak eta profesionalak salbu–, eta aldagelak eta dutxak itxita egongo dira –igerilekuetan izan ezik–.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.