Bihar bertan hasiko da Osakidetza txandak ematen, eta aurreko asteko hitzorduak galdu zituztenak izango dira lehenengoak; hots, suhiltzaileak, ertzainak, udaltzainak, eta beste alor sanitario eta soziosanitarioko langileak. Bestetik, hezkuntza-sektoreko profesionalei gaur hasita iritsiko zaizkie txanda hartzeko mezuak haien mugikorretara.
Sailburuaren aurreikuspenen arabera, aste honetan jarriko zaizkie dosiak txertoa txertatzeke geratu zirenei (hezkuntza-eremua, garraioa, portuak, aireportuetako suhiltzaileak eta arrantzaleak), eta datorren astean, 65 urte edo gutxiagoko biztanleria orokorraren txertaketa abiatuko da. "Hori guztia dosiak eskuragarri egotearen mende egongo da", zehaztu du Sagarduik.
Bestalde, sailburuak AstraZenecarena txerto "eraginkorra" eta "segurua" dela baieztatu du, eta txertoa jartzea elkartasun ekintzatzat jo du.
