6.593 PCR eta antigeno proba egin zituzten atzo, egubakoitza, Hego Euskal Herrian eta 426 koronabirus kasu atzeman zituzten. Lurraldeka aztertuta, 47 kasu dira Araban atzemandakoak, 168 Bizkaian, 110 Gipuzkoan eta Nafarroan beste 100. Halaber, beste erkidego edo toki batzuetako beste kasu bat ere baieztatu dute. Positibotasun tasa %6,1ekoa da EAEn eta Nafarroan, %8koa.
Tasa horrek gora egiten jarraitzen du. EAEn, esaterako, herenegun %5,4koa zen eta atzo, %6,1ekoa. Nafarroan, bestalde, bi puntu egin du gora, herenegun %6koa zelako eta atzo, %8koa.
Ospitaleen egoerari dagokionez, COVID-19aren ondorioz 26 pertsona ospitaleratu zituzten atzo EAEn, eta gaitza duten 91 pertsona daude ZIUetan. Nafarroan, aldiz, atzo 72 pertsona zeuden ingresatuta COVID-19aren ondorioz eta horietako 16, ZIUetan. Era berean, Nafarroako Gobernuak jakinarazi du COVID-19aren ondoriozko heriotza berririk ez dela izan.
