Eskola Kirola debekatuta egon da COVID-19aren intzidentzia-tasaren eraginez eremu gorrian zeuden udalerrietan, baina joan den astetik, herri horietan ere jarduera hauek baimentzea erabaki du Eusko Jaurlaritzak. Beraz, nahiz eta Debagoieneko herri bat eremu gorrian sartu, eskola kirola egiten jarraitu ahalko dute bertan.
Leintz Eskola Kirola elkarteko koordinatzaile Susana Santorrek, erabaki honek duen garrantzia azpimarratu du: "Ilusio handiarekin hasi ginen protokolo guztia jarraituz, ekintza guztiak bideragarriak izan daitezen neurriak jarriz, eta espero dugu aurrerantzean lehiaketak edo beste era bateko jarduerak egin ahal izatea. Gaur gaurkoz, astean zehar baditugu jarduerak eta astebukaeretan familian egiteko proposamenak luzatzen ditugu. Adibidez, Hamabi tontor hamabi ikastetxe ekimenean familia mordoa parte hartzen ari dira. Hala ere, gure helburua, aurreragoko kirol ezberdinetako topaketak berreskuratzea eta antolatu ahal izatea da."
