Osakidetzak AstraZenecaren txertaketa azkartuko duela jakinarazi du, eta 55 urte edo gutxiagoko pertsonen 30 kolektibo identifikatu ditu. Momentu hauetan, Etxeko Arreta Zerbitzuko profesionalak, Haur Hezkuntzako eta Hezkuntza Bereziko hezkuntza-eremuko profesionalak, ertzainak, udaltzainak, polizia nazionalak, guardia zibilak, suhiltzaileak, espetxeetako funtzionarioak eta farmaziako bulegoetako profesionalak txertatzen ari dira. Eta hurrengoak honako hauek izango dira –denak ere 55 urtetik beherakoak badira–:
- Bilboko eta Pasaiako portuko profesionalak.
- Auzitegiko Medikuntzako Euskal Erakundeko profesionalak.
- Fisioterapeutak.
- Osasun Publikoko laborategietako pertsonala.
- Unibertsitateaz kanpoko irakasleak.
- Gazteen justizia-zentroetako langileak.
- Psikologiako profesionalak.
- Podologiako profesionalak.
- Optometristak.
- Albaitariak.
- Hortz-protesigileak.
- Arrantzaleak.
- Aterpetxeetako profesionalak.
- Edo iragaitzazko migratzaileen eta errefuxiatuen harrera-zentroetako profesionalak.
- Garraio publikoko pertsonala.
- Etxeetan arreta ematen duten udaletako gizarte-langileak.
- Supermerkatuetako kutxetako pertsonala.
- Presoak.
Txertoa jartzeko txanda, online
Osakidetzak jakinarazi du txertoa hartzeko zitazio-bide berriak aktibatuko dituela. Bihar bertan, hezkuntza arloko kolektiboek Osakidetzaren webgunean hitzordua eskatu ahal izango dute. Langileei mezu bat bidaliko zaie telefono mugikorrera –Euskal Osasun Zerbitzura eramandako zenbakira– , webgunean sar daitezkeela adierazteko.
