LABI batzordea, aldiz, egubakoitzean, martxoaren 5ean, batuko da, 16:30ean. Euskal Autonomia Erkidegoan mugikortasuna baimendu ala ez erabakiko du. EAEko udalerrien itxiera perimetrala altxatzea eta lurralde bakoitzaren barruan mugikortasuna baimentzea izango dute aztergai. Horretaz gain, pertsonen bilerak gehienez ere lau lagunekoak izatetik seira pasatzea ere aztertuko dute bileran. Horren harira, Gotzone Sagarduik asteon azaldu du ospitaleetako ZIUek "tentsionatuta" jarraitzen dutela, eta helburua intzidentzia-tasaren jaitsiera dela: "100.000 biztanleko 60 kasuraino jaistea dugu helburu, eta oraindik ere urrun gaude". Oraingoz ez dute ezer aurreratu eta batzarraren ostean, hartutako neurriak iragarriko dituzte.
Martxoan eta apirilean "zuhurtzia"
Gotzone Sagardui Jaurlaritzako Osasun Sailburuak atzo aurreratu zuen Aste Santuko oporren bueltan, EAEko konfinamendu perimetrala mantendu egingo zela. "Martxoan eta apirilean mugikortasuna mugatzeko neurri murriztaileak mantentzea beharrezkoa izango da. Erabateko zuhurtzia behar da pandemiaren bilakaerak hobera egin dezan. Izan ere, azken egunotan moteldu egin da izurritearen egoera erakusten duten adierazleen beheranzko joera".
Nafarroako Gobernuak ere ildo bereko erabakia hartu gura du, eta Aste Santuan itxiera perimetralaren alde egin gura duela jakinarazi du: "Zuhurtzia beharrezkoa da atzera pausorik ez emateko".
