Grafiko eta datu guztiak ikusgai daude goiena.eus webguneko azken datuak atalean.
Intzidentzia-tasei erreparatuta, zenbatekoek Oñatin eta Arrasaten egin dute gora bakarrik; halere, ez da aldaketarik egon koloreei dagokienean: gorriz markatuta jarraitzen du Oñatik eta laranjaz Arrasatek. Intzidentziak behera egin du, ordea, Antzuola, Aramaion, Bergaran (gorri jarraitzen duen arren) eta Eskoriatzan eta berdin mantendu da Aretxabaletan, Elgetan eta Leintz Gatzagan.
Mapan daude datu guztiak:
>Grafiko guztiak modu interaktiboan ikusi hemen.
Heriotza bat, Oñatin
Jaurlaritzak jakinarazi du otsailaren 8tik 14ra 71 lagun hil zirela EAEn; horietako bat, Debagoienean (Oñatin). Gauzak horrela, azken datuen arabera, pandemia hasi zenetik, 4.731 heriotza erregistratu dira Hego Euskal Herrian. Herrietako heriotzen datuak goiko mapan daude ikusgai.
559 positibo Hego Euskal Herrian
Atzo 13.463 PCR eta antigeno proba egin zituzten Hego Euskal Herrian eta %4,6k eman zuen emaitza positiboa EAEn eta %2,3k Nafarroan; 559 kasu atzeman zituzten, zehazki. Lurraldeka, 327 kasu berri baieztatu zituzten Bizkaian, 109 Gipuzkoan, 60 Nafarroan, 56 Araban eta zazpi bestelako lurraldeetan erroldatutakoen artean. Bestalde, oinarrizko birsorkuntza tasak behera egin du EAEn beste behin: 0,79koa izan da azkena.
EAEko Ospitaleetan, 61 lagun ingresatu zituzten atzo, eta guztira 580 daude erietxeetan (herenegun baino 26 gutxiago); horietatik 159, ZIUn (aurreko egunean baino bederatzi gutxiago). Nafarroan aldiz, sei lagun ingresatu zituzten eta orotara 136 daude; horietatik 24, ZIUn.
