Zupiriak adierazi du Jaurlaritzak "errespetatzen" duela EAEko Auzitegi Nagusiak 500etik gorako intzidentzia-tasa metatua duten udalerrietako establezimenduak zabaltzeko baimena aitortu izana, nahiz eta "bat" ez datorren. "Auzitegiaren erabakiak ahuldu egiten ditu egun Jaurlaritzak osasuna zaintzeko dituen tresnak", zehaztu du. Hala, adierazi du Jaurlaritzaren zerbitzu juridikoek epaia aztertuko dutela, helegitea jarri ala ez erabakitzeko.
Egoera "oso kezkagarria"
Bozeramaileak esan du Arabako, Bizkaiko eta Gipuzkoako osasun egoera "oso kezkagarria" dela. Horri lotuta, Jaurlaritzaren helburua da intzidentzia tasa 100.000 biztanleko 60an kokatzea, "eta horretarako adituei egiten diegu kasu LABI Batzorde Teknikoan". Izan ere, "haiei dagokie" egoera aztertzea.
Ostegunean elkartuko da LABI Batzorde Teknikoa, eta ostiralean, aldiz, Aholku Batzordea.
