Gida didaktikoaren forma hartzen duen tresna aurkeztu dute gaur EUDELek eta Emakundek. Ekimen berriak "ikuspegi berritzailea" eskaintzen duela adierazi dute: "Gidaren asmoa da lehen urrats gisa baliagarria izatea udalak, mankomunitateak eta kuadrilak beraien ekintzak berrikusten hasteko, hain gai sentikor eta konplexu batean".
Indarkeria matxista jasan duten emakumeen egoera ikusarazteko eta bidea egiten jarrai dezaten, hainbat neurri jasotzen ditu gidak. Horietako bat da udalerrietan indarkeria matxista ez errepikatzeko baldintzak ezartzea.
Dagoeneko 1.000 ale banatu dira EAEko udal guztietan, eta horrez gain, bigarren bertsio bat ere argitaratu dute –aplikazio praktikoko funtsezko alderdien laburpena–. Biak deskarga daitezke EUDEL eta Emakunderen webguneetan.
Praktika egokiak eta adibideak, jasota
Landu den gaietako bat biktimaren kontzeptuarena izan da. "Biktimen kontzeptua berrikustea proposatzen du gidak, biktima guztiekiko eta indarkeriak beren bizitzetan dituen inpaktu guztiekiko ikuspegia zabalduz, eta horien bizirik irauteko ahaleginak eta gaitasunak gogoan hartuz", azaldu dute.
Bestetik, legedia eta araudia (nazioartekoa, estatukoa eta autonomikoa) ere berrikusten dira, eta tokiko gobernuen eskumenak aztertzen dira. Eta horrez gain, adibide praktikoak ere txertatu ditzute: arreta sanitarioa, psikologikoa eta harrera baliabideak lehenbailehen eskuratzera bideratzea, berriz laneratzeko enpresekin eta beste erakunde batzuekin bitartekaritza lanak egitea, biktimen ahalduntzea eta haien lan kolektiboa sustatzea... Eta udalerri batzuetan egindako "praktika egokiak" ere batu dituzte, besteak beste.