Jaurlaritzak azaroan erabaki zuen ostalaritza zerbitzuak ixtea beste hainbat neurrirekin batera COVID-19 gaitzaren hedapena geldiarazteko asmoarekin; azaroaren 7an sartu zen indarrean dekretua. Handik hilabete pasatxora, abenduaren 12an, neurriak berrikusi zituen LABIk eta zabaltzeko aukera eman zien tabernei eta ostalariei, zonalde gorrian zeuden herrietakoei izan ezik. Arrasateren intzidentzia-tasa (azken 14 egunetan COVID-19aren kasu positiboen tasa metatua) 500etik gorakoa izan da gaur arte, eta ondorioz, ia bi hilabete izan dituzte ateak itxita bertako ostalariek.
Aretxabaletaren kasuan abenduaren 12an zabaldu zituen ateak, baina ondoren, igo egin zen intzidentzia-tasa hori eta abenduaren 17an itxi beharrean izan ziren berriro. Gaurko datua 663,84 da. 5.000 biztanletik gorako herrien artean zonalde gorrian daude beste honako hauek ere: Beasain eta Lazkao, Gipuzkoan; eta Arrigorriaga eta Bermeo, Bizkaian.
5.000 biztanletik beherakoen artean Eskoriatza
5.000 biztanletik beherakoen artean, Eskoriatzan, esaterako ostalaritza zerbitzuek itxita jarraituko dute, Ataunen eta Olaberrian, legez. Kasu honetan honako irizpideak erabiltzen dituzte ateak itxi edo zabaldu erabakitzeko: intzidentzia-tasa (Eskoriatzan: 853,03); osasun eremuko intzidentzia-tasa (Debagoienean: 700,83); eta COVID-19aren kasu positiboen kopurua azken zazpi egunetan bi baino gehiago izatea (Eskoriatzan, 29).
