Aramaiorekin batera, Iruña Oka, Erribera Beitia eta Zuia dira taberna eta jatetxeak itxita izan beharko dituzten 5.000 biztanletik beherako herriak. Gogoratu, era berean, 5.000 biztanle baino gehiago dituzten herrien artean Arrigorriaga, Ermua, Eibar, Arrasate eta Ordizia direla ostalaritza berrireki ezingo duten udalerriak.
Bete beharreko irizpideak, hiru
5.000 biztanletik beherako udalerrietan ostalaritza eta jatetxe-establezimenduak itxita mantentzeko erabilitako irizpide epidemiologikoak hiru direla zehaztu du Osasun Sailak:
- Kasu positiboen intzidentzia-tasa metatua azken 14 egunetan 100.000 biztanleko 500ekoa edo hortik gorakoa izatea.
- Kasu positiboen intzidentzia-tasa metatua azken 14 egunetan 100.000 biztanleko 500 edo gehiagokoa izatea udalerriari dagokion osasun eremuan.
- Azken 7 egunetan udalerrian izandako kasu positiboen kopurua 2 baino gehiago izatea.
Aramaioren kasuan, gaur gaurkoz, 996,02-koa da udalerriko intzidentzia-tasa, 1201,80-koa osasun eremukoa eta azken zazpi egunetan 8 positibo berri zenbatu dituzte.
