Hitzordua bihartik, abenduak 11, aurrera eska daiteke, 08:00etatik 20:00etara bitartean, honako telefono zenbakietara deituta: Arrasateko osasun zentroa: 943 03 52 50 edo osasun-aholkua: 900 20 30 50. Aste guztian hartu ahal izango da txanda, baita asteburuan ere.
PCR probak egiteko azpiegitura Debagoieneko ospitaleko kanpo kontsulten eraikineko beheko solairuan jarriko dute, eta astelehenean hasi eta egubakoitzera bitartean egingo dituzte; ordutegia izango da: 10:00etatik 20:00etara.
Mugikortasun arazoak dituzten bizilagunei autotik jaitsi barik egingo diete proba. Hori nahi izanez gero txanda hartzerakoan zehaztu beharko da, hitzordua horretara moldatzeko; horiek arratsaldez egingo dute PCRa.
Udalerriko ikastetxeetako eta unibertsitateko ikasleek ez dute hitzordua eskatu beharrik izango, ikastetxeetako zuzendaritza-taldeekin antolatuko direlako.
Arrasateko bigarren baheketa
Orain dela hilabete eskas egin zuten baheketa Arrasaten, azaroaren 18an hasi eta 20ra bitartean, hain zuzen ere. Orduan, Debagoieneko OSIk emandako datuen arabera, 13 eta 40 urte arteko 6.161 pertsona zeuden deituta, eta 3.256k egin zuten PCR proba, %52,8k. Proba horietatik %2,2 izan ziren soilik positiboak, 71 kasu.
