Joan den egubakoitzean elkartu ziren eta adierazi dute bileraren helburua izan zela egoeraren berri zuzenean jasotzea eta herritarren eskaera helaraztea. Larrialdietarako zerbitzua gauerditik 08:00etara itxita dago orain, eta ondorioz, herritarrek ezin dute zerbitzua bertan jaso. Horregatik, hiru udalerrietako ordezkariek larrialdi zerbitzua "lehenetara ahalik eta lasterren" itzultzeko eskatu zieten. Debagoieneko ospitaleko arduradunek azaldu zieten murrizketaren arrazoia izan dela COVID-19ak eragindako egoerari aurre egiteko pertsonalaren birkokatzea. Eta alkateei jakinarazi zieten abenduaren 21etik aurrera berriz zabalduko dela gaueko larrialdi zerbitzua.
Eskualdean pandemiak eragindako egoera ere izan zutela berbetarako gai aipatu dute alkateek, eta herrietan aurrera begira har daitezkeen prebentzio neurriak aipatu zituztela.