Asteburuan zehar hautemandako koronabirus kasu positiboak gaur eman ditu aditzera Osasun Sailak. Azaldu dutenez, atzo 14 kasu berri hauteman zituzten, zapatuan 24 eta egubakoitzean 43.
Antzuolan eta Leintz Gatzagan izan ezik, bailarako gainontzeko herrietan atzeman dituzte kutsatze berriak asteburuan zehar. Herriz herri, Arrasate izan da kasu gehien erregistratu dituena hiru egun hauetan –erdiak baino gehiago– (49), eta atzetik izan ditu Oñati (10), Bergara (9), Aretxabaleta (4), Elgeta (4), Aramaio (3) eta Eskoriatza (2).
Taula honetan daude Osasun Sailaren datuak kontuan hartuta, bailaran atzemandako azken positiboak, eta baita datu metatuak eta 1.000 biztanleko kutsatzeak ere.
| HERRIA | ASTEBURUKO KASUAK | POSITIBO METATUAK | 1.000 BIZTANLEKO |
| Arrasate | +49 | 1.714 | 77,70 |
| Oñati | +10 | 519 | 45,71 |
| Bergara | +9 | 959 | 63,92 |
| Aretxabaleta | +4 | 326 | 45,93 |
| Elgeta | +4 | 44 | 38,63 |
| Aramaio | +3 | 61 | 40,50 |
| Eskoriatza | +2 | 185 | 45,51 |
| Antzuola | +0 | 140 | 63,61 |
| Leintz Gatzaga | +0 | 3 | 12,00 |
| GUZTIRA | 81 | 3.951 | 61,09 |
Egunez egun, egubakoitzean 24 kasu erregistratu ziren Arrasaten, zazpi Bergaran, sei Oñatin, hiru Aretxabaletan, bi Elgetan eta bakarra Eskoriatzan. Zapatuan, aldiz, hamasei izan ziren Arrasatekoak, hiru Oñatikoak, bina Aramaio eta Elgetakoak, eta bakarra Aretxabaletakoa. Eta atzoko datuen arabera, bederatzi positibo berri zenbatu zituzten Arrasaten, bi Bergaran eta bana Aramaion, Eskoriatzan eta Oñatin.
EAEn, 1.287 kutsatze asteburuan
Euskal Autonomia Erkidegoari dagokionez, 1.287 kasu berri baieztatu dituzte azken hiru egunetan: 520 egubakoitzean -8.041 proba egin zituzten–, 452 zapatuan –6.985 proba egin zituzten– eta 315 domekan –5.223 proba egin zituzten–.
Lurraldeka, asteburuan 449 positibo berri erregistratu dituzte Gipuzkoan, 219 Araban eta 606 Bizkaian.
Bestetik, domekara arte 131 pertsona daude EAEko ospitaleetako ZIUetan erietxeratuta.
