Aretxabaletako, Eskoriatzako eta Leintz Gatzagako 13 eta 40 urte arteko 3.171 biztanle deitu dituzte PCR proba egitera asintomatikoak atzemateko asmoarekin, eta 14 eta 18 urte arteko ikasleekin hasi dute bi egun iraungo dituen baheketa. Gaur, 1.281k egingo dute proba, eta biharko, 532k dagoeneko txanda hartuta zuten gaur eguerdirako.
Halere, herritarrak oraindik garaiz daude hitzordua hartzeko: Aretxabaletako osasun zentrora (943 71 19 59), Eskoriatzakora (943 71 44 52) edo osasun-aholkurako telefonora deituta ( 900 20 30 50). Debagoieneko Ospitaletik azaldu dute garrantzitsua dela bertaratzea: "Azpimarratu behar da bailaran egindako aurreko baheketetan lortutako estaldura-mailak ez duela deituta zeudenen % 55 gainditzen. Beraz, berriro diogu, komunitatearen transmisioak behera egin dezan, ezinbestekoa dela baheketara joatea".
Debagoienean egiten den hirugarren baheketa da; aurretik Bergaran eta Arrasaten egin dituzte.
