Aretxabaletako kasuan, Sareko kideek bilera sorta egin dute azken egunetan herriko eragile ezberdinen atxikimendua lortzeko; antolatzaileen iritziz gaurkoan "igarri egin da" hori, jende askok parte hartu baitu arratsaldeko ekintza ibiltarian.
Amaieran, Herriko Plazara heltzean, aldarrikapenak aireratu dituzte. Azaldu dutenez, "zabala eta anitza da bestelako espetxe politika bat aldarrikatzen duten aretxabaletarren multzoa", eta gizartea "aktibitzen jarraitzea funtsezkotzat" jo dute, aurrerapauso berriak emateko. Garikoitz Garcia herriko presoa Picassentetik Zaballara lekualdatzea albiste pozgarria dela adierazi dute, batez ere, haren senideen "sufrimendua" apalduko duelako. Hala ere, oraindik eskubide asko "bete gabe" daudela azladu dutela, eta horiek lortu arte "pausoak ematen jarraitzeko" beharra azpimarratu dute.
Arrasaten, manifestazioa
Arrasatearrak ere kalera irten dira. 19:00etan, ehunka lagunek abiatu dute manifestazioa Seber Altube Plazatik Bidea gara, bidean gaude lelopean. Parte hartzaileek banderolak eta pankartak eraman dituzte eskuetan, eta presoen eskubideen aldeko aldarriak egin dituzte ibilbide osoan zehar. Bihar, domeka, Arrasateri Bira egingo dute; bidegorriz bidegorri, oinez. Hamar kilometro inguruko ibilbidea izango da, familia giroan egiteko aproposa.
Antzuolan elkarretaratzea
Antzuolarrek ere euren atxikimendua azaldu dute gaurkoan. Distantziak mantenduz eta segurtasun neurriak betez elkartu dira, eta Izan Bidea ekimeneko ikur diren geziekin bete dute Zurrategi plaza.